Premyé jou-la:Limyè

Chapit 1

1.Ankoumansman-la, Elohim (Bondyé) kreye syèl-la èvè latè-la.

2.É latè-la pa té tini pon fòm, pa té tini anyen adan’y: teneb-la té anlè fas mas dlo-la, é Ruach Elohim (Lespri Bondyé) té ka plané anlè fas lé dlo-la.

3. É Elohim (Bondyé) té di pou limyè pé fet é limyè vini fet.

4. Elohim (Bondyé) té vwè limyè-la té bon épi i tracé yon larèl pou séparé limyè-la èvè teneb-la.

5. Elohim(Bondyé) té rélé limyè-la, lanjouné é teneb-la, i rélé’y, lannwit. É té tini yon swa, té tini yon maten, premye jou-la.

Dezyèm jou-la:vout-la

6. É Elohim té di pou sa fè yon vout an mitan lé dlo-la, é ke vout-la sa dwèt séparé dlo é dlo.

7. É Elohim té fè vout-la é i séparé dlo ki té anba vout-la é dlo ki té anlè ‘y. Sé sa mem ki fèt.

8. Elohim té rélé vout-la syèl. É té tini yon swa, té tini yon maten, dezyèm jou-la.

Twazyèm jou-la: koté sèk-la

9.É Elohim té di: tout dlo ki an ba syel-la sanblé yon sèl koté pou sa lésé koté sèk-la paret. Sé sa mem ki fèt.

10.É Elohim té rélé koté sèk-la, tè, é tout dlo-la sanblé yon sèl koté, i rélé’y lanmè: é Elohim té vwè i té bon.

11.É Elohim té di kon sa, sé pou la tè fè zèb pousé: plant ki simé grenn, pyé fwi ki fè fwi tout kalité dapré lespes-ay, ki tini grenn adan’y menm, asi la tè. Sé sa mem ki fèt.

12.É tè-la fè pousé zèb, plant ki simé grenn daprè lespes-ay, pyé fwi ki fè fwi ki tini grenn adan’y menm daprè lespes-ay: é Elohim vwè ke i té bon.

13.É té tini yon swa, té tini yon maten, twazyèm jou-la.

Katriyèm jou-la: lalin, solèy, zetwal

14. É Elohim té di pou limyè fet adan vout syèl-la pou séparé jou ouvè èvè lannwit, pou pé sa yon makè, é montré lè, é jou, é lanné.

15. É té tini limyè adan vout syèl-la pou pé sa bay limyè anlè tè-la. Sé sa mem ki fèt.

16. É Elohim té fè dé gran limyè; é tala ki pli gran la pou jou ouvè é pli piti la pou lannwit, é i fè zetwal.

17. É Elohim mété yo adan vout syèl-la pou pé sa kléré la tè-la.

18.É pou pé sa gouvènè asi lanjouné é asi lannwit, é pou sa séparé limyè-la èvè teneb-la: é Elohim vwè ke i té bon.

19.É té tini yon swa, té tini yon maten, katriyèm jou-la.

Senkyèm jou-la:zozyo é bèt-lanmè

20. É Elohim té di pou tout dlo ki tini bay anpil bèt vivan é zozyo ki ka volé anlè la tè, antravè vout syèl-la.

21. É Elohim kreye se gran bèt-lanmè la, é tout kalité bèt ki tini lavi adan’y ki ka mouvmanté adan dlo, ki bay anpil sot daprè lespes-ay é tout kalité zozyo a zel daprè lespes-ay: é Elohim vwè ke i té bon.

22. É Elohim béni yo, i di kon sa, fè fwi é miltipliye, ranpli dlo sa ki ka viv adan lanmè é zozyo, miltipliye asi latè.

23. É té tini yon swa, té tini yon maten, senkyèm jou-la.

Sizyèm jou-la: bèt si latè

24.É Elohim té di kon sa, sé pou la tè fè tout bèt vivan daprè lespes-ay, bet ki ka leve adan pak, bèt ki ka ranpe asi latè, é bèt si latè daprè lespes a yo. Sé sa mem ki fèt.

25.É Elohim kreye tout kalite bèt si latè daprè lespes-ay é bèt ki ka leve adan pak daprè lespes a yo é tout bitin ki ka ranpe si latè daprè lespes a yo: é Elohim vwè ke li té bon.

26. É Elohim di, an nou kreye Adam zimaj an nou, pou i semblè nou é pou tout jenerasyon-ay gouvène asi pwason lanmè-la é asi zozyo syel-la é asi bet ki ka leve adan pak, asi tout latè, é asi tout kalite bet ki ka ranpe asi latè.

27.É Elohim kreye Adam zimaj-ay, zimaj a Elohim, i kreye’y, gason é fil, i kreye yo.

28.É Elohim béni yo, é Elohim di yo, poté fwi é miltipliye, é ranpli latè, é soumet li: é dominé anlè pwason lanmè, zozyo syel-la é tout kalité bèt vivan ki ka mouvmanté si latè.

29. É Elohim di, mi, mwen ba zot tout kalité zèb, ki sime grenn , grenn ki anlè kwout tout latè-la, é tout kalité pyébwa, ke tini fwi ki sime grenn: pou zot, sa ké manje.

30. É pou tout bèt latè, pou tout zozyo an syèl, pou tout bèt ki ka ranpé si latè ki tini la vi adan’y, mwen ka bay zeb vet pou yo manje. Sé sa mem ki fèt.

31. É Elohim vwè, tout sa ke i té fè é, mi, li té byen bon. É té tini yon swa, té tini yon maten, sizyèm jou-la.

Setyèm jou-la: Elohim repoze’y

Chapit 2

1. Konsa, té fini fèt tout lé syel-la, é latè-la é tout bann larmé a yo.

2. É Elohim, setyèm jou-la, fin fè mannèv-ay ke i té fè, é i pozé setyèm jou-la pou tout travay i té fè.

3. É Elohim béni setyèm jou-la é i mété senteté-ay anlè ‘y davwa an jou-la sa, i té pozé pou tout travay-ay ki kréasyon i té fè.

4. Mi akouchman sé syel-la, é latè-la lè yo té kreye yo, an jou la YaHWeH Elohim té fè tè-la é sé syel-la.

5. É tout touf pye bwa an laplenn avan li té fet si latè-la, é tout zèb an jaden avan li té fin pousé davwa YaHWeH Elohim po té ko bay lapli si latè é Adam pa té la pou travay latè-la.

6. É on vapè dlo lévé é soti dépi latè-la é rozé tout krout latè-la.

7. É YaHWeH Elohim fowmé Adam dépi pousyè latè-la et souflé adan zévan-ay souf lavi-la é Adam vini yon zam vivant.

8. É YaHWeH Elohim té planté on jaden an Eden, koté soley-la ka levé, sé la i té placé Adam ké i té kreyé.

9. É YaHWeH Elohim té fè grandi é soti an tè la, tout kalité pyébwa ki bel a vwè, é ki bon pou mangé, é li té fè pyébwa lavi osi, pa an mitan jaden la, é pyébwa konnesans lebyen é lemal.

10. É on rivyè té ka soti Eden pou rozé jaden-la, é dépi bo lasa, i té ka séparé an kat branch.

11. Non a prèmyé branch la sété Pichon, li té ka fè lantou péyi Havila; sé koté lasa té tini lò.

12. É lò a péyi lasa bon, é té tini bdellium -gòm aromatik- é on pyè rouj -onyks.

13. É non a dézyèm rivyè-la, té Guihon é sété’y mem ki té ka fè lantou tout péyi Kush-la.

14. É non a twazyèm rivyè-la sé Tig, ki ka koulé koté Es a Péyi Asshur-la, é non a katryèm rivyè-la sé Lefrat.

15. É YaHWeH Elohim pran Adam é mété’y an jaden Eden-la pou travay-li é swagné’y.

 16.É YaHWeH Elohim komandé Adam é i di’y kon sa:  » an tout kalité pyé bwa adan jaden la ou pé manjé manjé « .

17. Kanta pyebwa ki bay konnesans sa ki byen sa ki mal, fo pa ou manje adan, paskè dayepouyon jou la ou manjé adan ou kay mo.